Esbosu Estatutu [final]

Hafoin enkontru 27.02.2021

Kapitulu I Naran, Sede

Artigu 1º Naran

  1. Asosiasaun ida ne’e naran Movimento Cívico dos Profissionais de Timor-Leste, ho sigla MCPTL
  2. MCPTL hari iha loron ….. fulan…. tinan…., liu husi Asembleia Jeral nia membru sira.
  3. Fundasaun MCTL marka ho publikasaun Akta Fundasaun ne’ebé Membru Fundador sira hotu asina

Artigu 2º Sede

  1. MCPTL nia sede iha Dil.i.
  2. MCPTL bele harii mos sukursal subnasional (rejional ka munisipal).

Kapitulu II Natureza, Objetivu, Vizaun, Moto, Misaun,

Artigu 3º Natureza

  1. MCPTL organizasaun profisionál independente ne’ebé la iha fim lukrativu.
  2. MCPTL halibur profisional timor-oan husi area oioin.
  3. MCPTL respeita profisaun ida-idak nia prinsipiu étiku no deontolojiku no fasilita no advoga observansia prinsípiu sira ne’e.
  4. MCPTL la iha filiasaun polítika, maibe fo liberdade ba nia membru sira atu hili filiasaun plitika tuir ida-idak nia konsiensia.
  5. MCPTL sei la halo deskriminasaun bazeia ba sexu, kor kulit, rasa, relijiaun ou afiliasaun polítika iha nia atividade sira.
  6. MCPTL atua tuir prinsípiu juridiko-legal sira ne’ebé defini iha Konstituisaun RDTL.

Artigu 4º Objetivu

  1. MCPTL advoga ho promove profisionalismu iha area prestasaun servisu hotu-hotu.
  2. MCPTL luta ba implementasaun, observansia no manutensaun garantia seguransa no kualidade prátika profisional iha Timor-Leste.
  3. MCPTL advoga no promove prinsípiu meritrokrasia iha administrasaun públika.

Artigu 5º Vizaun

  1. Pratika profisional sira hotu iha Timor-Leste bele providensia servisu ho seguransa no kualidade tuir lege artis kada profisional ba utente sira hotu.
  2. Administrasaun publika ne’ebé valoriza no respeita meritrokrasia.

Artigu 6º Moto

Mérito no profizionalizmu maka abut no hun ba progresu iha Timor-Leste.

Artigu 7º Misaun

  1. Sai mahon ba profesional husi área oin-oin.
  2. Sai organizasaun multiprofisional kredível.
  3. Advoga kriasaun entidade kompetente no dedikada ba rejistu no regulamentasaun kada profisaun.
  4. Insentiva kada grupu profisional atu estabelese normas no padroens ba kompetensia no pratika profisional iha ida-idak nia área.
  5. Advoga implementasaun, observansia no manutensaun ba prinsípius étikus no deontolójikus kada profisaun.
  6. Advoga sistema rejistu nasional ba profisional sira hotu.
  7. Advoga kriasaun mekanismu, entidade i/ou instituisaun ne’ebé responsabiliza ba sertifikasaun no monitorizasaun pratika profisional iha kada área pestasaun servisu profisional.
  8. Advoga kriasaun sistema ka rejime karreira profional ne’ebé valoriza kualifikasaun, kompetensia, abilidade no meritrokrasia.
  9. Sai referensia ba padraun kompetensia no prátika profisional oioin.
  10. Fo protesaun ba profisional sira hotu.
  11. Fo pretasaun ba komunidade relasiona ho prátika profisional

Artigu 8º Valores no Prinsipius Orientadores

  1. Profisaun hotu-hotu iha estatutu legal hanesan.
  2. Profisional sira hotu iha estatutu legal hanesan.
  3. Kada pratika profisional sai nudar manifestasaun implementasaun arte no siensia atu presta servisu espesializadu iha determinada area.
  4. Tempu no experiensia pratika kontinua bele garante exselensia iha pratika profisional.
  5. Harii no hametik prinsipiu meritrokrasia iha administrasaun publika.
  6. Servisu ho prinsipiu kolejialidade iha estabelesimentu normas no padroens kada profisaun.

Kapitulu III Membru

Artigu 9º Kondisaun atu sai Membru

  1. Bele sai membru MPCTL sidadaun Timor-oan sira hotu ne’e iha profisional ruma, komprova ho sertifikadu kualifikasaun akademika miinimu nivel lisensiatura.
  2. Atu sai membru, kandidatu interesadu bele hato’o rekerimentu ho dokumentus komprovativus kualifikasaun akademika no sertifikasaun profisional ba sekretariadu MCPTL.
  3. Prosedimentu ba rejistu no sertifikasaun membru sei regula ho dokumentu rasik husi Diresaun Ezekutiva.
  4. Kandidatu ne’ebé preenxe rekizitus atu sai membru bele hetan tomada pose iha tempu no fatin ne’ebé Diresaun Ezekutiva determina.
  5. Membru ne’ebé simu tiha ona pose bele simu kartaun membru.
  6. Membru ne’ebé simu tiha ona pose sei rejista iha Livru Rejistu Membru no publika iha Diretoria Membru iha orgaun komunikasaun MCPTL nian.
  7. Membru bele hetan demisaun ou ezonerasaun ho desizaun Diresaun Ezekutiva.

Artigu 10º Kategoria Membru

Kategoria membru MCPTL:

  1. Membru Fundador mak membru sira ne’ebé partisipa ativamente iha prosesu estabelesmentu MCPTL, partisipa iha Kongresu Dahluk MCPTL no asina ata fundasaun MCPTL.
  2. Membru Benemeritu mak membru sira ne’ebé halao doasaun espesial ka presta servisu estraordináriu ba MCPTL.
  3. Membru Benemeritu hetan titulu ne’e Asembleia Jeral bazeia ba proposta husi Diresaun Ezekutiva.
  4. Membru Ordináriu mak membru sira hotu ne’ebé hetan pose husi Diresaun Ezekutiva.

Artigu 11º Direitus no Deveres Membru sira nian

  1. Membrus sira nia direitu:
    1. Partisipa iha Asembleia Jeral MCPTL.
    2. Vota no simu vota ba kargu eletivu sira iha MCPTL nia laran.
    3. Membru Benemeritu no membru onorariu laiha direitu atu vota no atu hetan votu.
  2. Deveres membru nian:
    1. Kumpre estatutu no rejimentu MCTL.
    2. Halao saída mak Diresaun Ezekutiva Determina.
    3. Membru sira la responde ba obrigasoens no enkargus sosiais MCPTL nian.

Artigu 12º Lakon Direitu Membru

  1. Wainhira iha kauza justa, Diresaun Ezekutiva bele atu demite ou exklui membru ida husi MCTL.
  2. Membru ne’ebé hetan exkluzaun ou demisaun husi DIresaun Jeral bele halo rekursu baAsembleia Jeral.

Kapitulu IV Orgaun sira iha MCPTL nia laran

Seksaun I Orgaun Deliberativu

Subseksaun A Asembleia Jeral

Artigu 13º Estatutu

  1. Asembleia Jeral mak orgaun deliberitivu maximu MCPTL.
  2. Asembleia Jeral halao kada tinan tolu.
  3. Partisipantes Asembleia Jeral mak membru ativu sira hotu.
  4. Asembleia Jeral bele realiza extraordinariamente wainhira hetan konvokasaun husi:
    1. Diresaun Ezekutiva.
    2. Konsellu Fiskal.
    3. Rekerimentu his 1/5 husi membru kontribuinte sira.

Artigu 14º Kompozisaun

Asembleia Jeral komposta husi:

  1. Sesaun Preparatoria.
  2. Sesaun Plenaria.
  3. Sesaun Komisaun.
  4. Asembleia Jeral Extraordinaria komposta husi Sesaun Plenaria deit.

Artigu 15º Kompetensias

  1. Sesaun Preparatoria:
    1. Determina Kuorum.
    2. Deside konaba Rejimentu Asembleia Jeral.
    3. Deside konaba Ajenda Asembleia Jeral.
    4. Hili Prezidium ne’ebe sei dirije Asembleia Jeral.
  2. Sesaun Plenaria:
    1. Deside Estatutu, Regulamentu Internu, Gia Orientasaun, Organizasaun, Politika no Estratejia MCPTL.
    2. Legitima desizaun Diresaun Ezekutiva sira ne’ebé presiza legalizasaun husi Asembleia Jeral.
    3. Hili Diresaun Ezekutiva.
    4. Hili Konsellu Fiskal.
    5. Avalia konta responsabilidade Prezidente Diresaun Ezekutiva.
    6. Diskute no omologa kontas no balansu bazeia ba relatoriu husi KonselluFiskal.
    7. Simu no deside rezultadus husi sesaun komisaun sira.
    8. Simu rezultadu sesoens espesiais atu enkamiña ba Prezidente Diresaun Ezekutiva.
    9. Fo apresiasaun ba rekursus kontra desizaun sira Diresaun Ezekutiva nian.
    10. Fo kondekorasaun ou sinal rekoñesimentu ba ema sira ne’ebe halo diak ou halo buat ruma ho valor ba MCPTL.
    11. Konsede títulu membru beneméritu no membru honoráriu ne’ebé Diresaun Ezekutiva propoin.
    12. Deside konaba fatin no tempu Asembleia Jeral tuir mai.
  3. Sesaun Komisaun:
    1. Debate no hili materia ne’ebé sei hato’o iha Sesaun Plenaria.
    2. Entrega rezultadu Sesaun Komisaun ba Sesaun Plenaria atu hetan aprovasaun hodi sai nudar Desizaun Asembleia Jeral.

Artigu 16º Rejimentu

  1. Diresaun Ezekutiva mak responsabiliza ba organizasaun Asembleia Jeral.
  2. Asembleia Jeral konvoka husi nofitikasaun husi Diresaun Ezekutiva ba membru sira liu husi meius komunikasaun sosial ezistente, iha tempu minimu loron 14 antes hahu Asembleia Jeral.
  3. Konvokatória ne’ebe refere iha númeru anterior tenki indika fatin, loron no oras ne’ebe sei halao Asembleia Jeral.
  4. Asembleia Jeral hetan partisipasaun membru ativu sira hotu, observadores no konvidadus.
  5. Notifikasaun konvokatória tenki haruka individualmente ba kada membru tuir informasaun ne’ebé kada membru disponibiliza durante inskrisaun.
  6. Asemblei Jeral konsidera lejitima wainhira hetan partisipaun husi minimu 2/3 husi numeru membrus inskritus ho direitu votu iha primeira konvokatoria.
  7. Partisipantes Asembleia Jeral iha direitu ba votu.
  8. Numeru observadores deside husi Diresaun Ezekutiva.
  9. Observadores so iha deit diretu koalia.
  10. Diresaun Ezekutiva mak deside entidade sira ne’ebe atu konvida.
  11. Konvidadus laiha direitu koalia nein direitu votu.
  12. Mekanismu atu foti desizaun Asembleia Jeral halao durante Sesaun Preparasaun.
  13. Sesaun Dahuluk Asembleia Jeral prezide husi Prezidente Diresaun Ezekutiva ho ajenda unika atu hili Meza Sesaun Plenaria Asembleia Jeral.
  14. Meza Sesaun Plenaria kompostu husi Prezidente, Sekretariu no Vogal ne’ebe partisipantes Asembleia Jeral mak hili, husi partisipantes sira ne’ebe prezente.
  15. Hafoin eleisaun, Meza Sesaun Plenaria mak kontinua dirije Asembleia Jeral hahu kedas ho ajenda aprezentasaun konta responsabilidade Diresaun Ezekutiva.
  16. Hafoin hato’o tiha ona konta responsabilidade, Diresaun Ezekutiva konsidera demitidu ona.

Subseksaun B Sorumutu Anual

Artigu 17º Estatutu

  1. Sorumutu Anual hala’o tinan ida dala ida, iha loron no fatin ne’ebé determina tinan ida antes.
  2. Sorumutu Anual ne’e, Diresaun Ezekutiva maka organiza hodi delibera kona-ba buat hirak tuir mai:
    1. Relatóriu no Planu Asaun Anual Diresaun Ezekutiva nian.
    2. Atividade sientifika no naun-sientifika.
    3. Fo’o pose ba membru foun.
    4. Asuntu urjenti ruma ne’ebé Diresaun Ezekutiva propoin.

Artigu 18º Kompetensias

  1. Avalia programa servisu nasional Diresaun Ezekutiva, kompleta no hadia programa ne’ebe atu ezekuta iha tinan tuir mai.
  2. Legitima desizaun sira Diresaun Ezekutiva nian ne’ebé presiza legalizasaun husi Sorumutu Anual.
  3. Prepara material ba Asembleia Jeral tuir mai.

Artigu 19º Rejimentu

  1. Diresaun Ezekutiva mak responsabiliza ba organizasaun Sorumutu Annual.
  2. Sorumutu Anual hetan partisipasaun husi Diresaun Ezekutiva, membrus fundadores sira hotu no Konsellu Fiskal.
  3. Sesoens Sorumutu kompostu husi sesoens organizasionais no sesoens sientifikas.
  4. Sesoens organizasionais kompostu husi Sesaun plenaria no sesaun komisaun.
  5. Sesaun Plenaria dirije husi Prezidente Diresaun Ezekutiva.

Seksaun II Orgaun Ezekutivu

Subseksaun A Diresaun Ezekutiva

Artigu 20º Estatutu

  1. Diresaun Ezekutiva mak orgaun ezekutivu maximu MCPTL ne’ebe responsabiliza ba moris organizasaun nian.
  2. Diresaun Ezekutiva hili iha Asembleia Jeral.
  3. Diresaun Ezekutiva responde ba Asembleia Jeral.
  4. Diresaun Ezekutiva hetan mandatu ba tinan tolu.
  5. Membru MCPTL ida so bele sai Prezidente Diresaun Ezekutiva maximu durante mandatu rua.
  6. Bele deit sai Prezidente Diresaun Ezekutiva membru ne’ebe iha integridade ás, etika, moral, disiplina, lealdade, dedikasaun ás no iha empeñu bo’ot atu lori organizasaun ne’e ba oin.
  7. Membru ne’ebe eleiível tenki preenxe mós kondisoes sira hanesan tuir mai ne’e:
    1. Hakarak.
    2. Iha kompromisu atu servisu ba MCPTL.
    3. Hasai kursu liu tinan 5.
    4. Sai membru ativu minimu tinan 3.
    5. Permanese iha Nasaun minimu tinan 3.
    6. Selu nia kuota kompleta.
    7. Saudavel fizika no mentalmente.
    8. Iha atitude espiritual, moral no sosial ne’ebe diak Expriensia tur iha estrutura munisipal ou nasionál.
    9. Tenki iha rezidensia iha Dili.
    10. Maximu bele reeleitu dala ida.
  8. Kondisaun iha númeru 3.d. la vigora ba Diresaun Ezekutiva dahuluk
  9. Prosedimentu ba eleisaun Diresaun Ezekutiva no Konsellu Fiskal sei regula iha Rejimentu Internu.
  10. Membru Diresaun Ezekutiva hetan demisaun wainhira:
    1. Mandatu hotu ona.
    2. La permanese iha nasaun laran iha tempu liu husi tempu sorin-balu husi nia mandatu.
    3. Mate ka hetan defisiensia ruma ne’ebe impede nia atu halao nia funsaun.
    4. Hetan sansaun ruma

Artigu 21º Kompozisaun

Diresaun Ezekutiva kompostu husi Prezidenti ida, Sekretariu ida, Tezoureiru ida no reprezentante kada kategoria profisional.

Artigu 22º Funsoens no Kompetensias

  1. Implementa Estatutu MCPTL.
  2. Prepara Programa Servisu no Orsamentu Anual.
  3. Propoin valor mensalidade ou kontributu obrigatoriu husi membru sira ba Asembleia Jeral atu hetan aprovasaun.
  4. Jere patrimóniu no riku-soi organizasaun nian.
  5. Elabora no aprezenta relatóriu anual ba Asembleia Jeral.
  6. Konvoka Asembleia Jeral.
  7. Komunika no koopera ho instituisoens publikas no privadas ba kolaborasaun mútua iha atividade sira ho interese komum.
  8. Reprezenta ka nomeia reprezentante MCPTL ba atividades iha rai laran no rai liur.
  9. Kontrata no demite funsionáriu sira.
  10. Simu no fo pose ba membrus sira.
  11. Fo’o sansaun ba membru sira, inklui demisaun ou exkluzaun.
  12. Membrus Diresaun Ezekutiva la hetan kompensasaun monetária ba funsaun sira ne’ebé sira ezerse iha MCPTL.
  13. Diresaun Ezekutiva tenki reune pelu menus fulan 1 dala ida.
  14. Kompete ba Prezidente:
    1. Reprezenta MCPTL ativa no pasivamente, juridika no extrajuridikamente.
    2. `Konvoka no prezide Sorumutu Annual.
    3. Konvoka no prezide reuniaun DIresaun Ezekutiva.
    4. Asina xeke ka mandatu pagamentu sira ne’ebé Tezoureiru apreenta ba.
  15. Kompete ba Sekretáriu:
    1. Halo akata reuniaun sira Diresaun Ezekutiva nian.
    2. Publika notisia no atividade relevantes MCPTL nian.
  16. Kompete ba Tezoreiru:
    1. Arrekada no kontabiliza kontribuisaun husi membru sira no benefisiariu sira.
    2. Selu konta sira ne’ebé Prezidente autoriza ona.
    3. Hato’o balansu trimestral ba Konsellu Fiskal.
    4. Aprezenta relatóriu finanseiru ba Asembleia Jeral
  17. Membru sira husi kada kategoria profisional bele hili reprezentante ida atu fo apoiu tekniku ba Prezidente.

Subseksaun B Konsellu Fiskal

Artigu 23º Estatutu

  1. Konsellu Fiskal mak orgaun neebe responsabiliza ba fiskalizasaun atividade no kontas MPCTL nian.
  2. Konsellu Fiskal eleje iha Asembleia Jeral.
  3. Mandatu Konsellu Fiskal koinside mandatu Diresaun Ezekutiva.
  4. Konsellu Fiskal reune mínimu fulan 3 dala ida

Artigu 24º Kompozisaun

  1. Konsellu Fiskal hili husi Asembleia Jeral.
  2. Konsellu Fiskal kompostu husi Prezidente ida, vogal nain 2 ho suplente nain 3.
  3. Iha kazu ne’ebé, tanba razaun ruma, iha vakansia iha kargu Prezidente, vogal ida bele asume kargu nudar Prezidente.
  4. Suplente sira bele asume kargu ne’ebé mamuk.
  5. Substituisaun ba kargu vakante halao durante reuniaun trimestral’
  6. Prezidente Konsellu Fiskal tenko notifika Diresaun Ezekutiva iha prazu loron 15 laran wainhira iha substituisaun karga iha KOnsellu Fiskal nia laran

Artigu 25º Funsoens no Kompetensias

  1. Fiskaliza jestaun administrativa no finanseira Diresaun Ezekutiva.
  2. Fiskaliza implementasaun programa atividade anual Diresaun Ezekutiva.
  3. Ezamina eskriturasaun Diresaun Ezekutiva.
  4. Ezamina balansu semestral ne’ebé Tezoureiru aprezenta.
  5. Halo inkeritu konaba irregularidades sira neebe mosu.
  6. Halo auditoria ba relatriu ezekusaun programa Diresaun Ezekutiva.

Kapitulu V Dispozisoens Finais

Artigu 26º Omisoens

Diresaun Ezekutiva iha kompetensia atu rezolve omisoens sira iha Estautu ne’e  no aprezenta ba Asembleia Jeral atu hetan aprovasaun.

Artigu 27º Alterasaun Estatutu

Estatutu bele hetan alterasaun iha naran tempu ida bazeia ba desizaun husi 2/3 membru sira ne’ebé prezente iha Asembleia Jeral ne’ebé konvoka ba objetivu ida ne’e

Artigu 28º Entrada ein vigor

Estatutu ida ne’e vigora hahú loron publikasaun Akta Rejistu iha Notariadu Dili.

  Aprova iha Asembleia Jeral ne’ebé realiza iha Dili, iha  loron….. Prezidente Asembleia Jeral, Asinatura & Naran

Sergio Lobo

By Sergio Lobo

Mediku. Servisu iha Klinika Cindranita